近年廣告嘅拍攝手法，大部份已經轉型為微電影式，一嚟故事內容可以夠生鬼，二嚟放喺網上播出，唔止慳錢，仲吸引一班網民收睇，反應絕對比「舊式」廣告事半功倍。 最近有個貸款及旅遊保嘅平台，邀請咗畀人話「雷神」似佢嘅徐錦江拍攝廣告，不過今次佢唔係扮「雷神」，而做番當年喺《九品芝麻官》裏面嘅「豹子頭」，仲一連拍咗三集，分別拍住羅莽同前無綫藝人岑寶兒（阿夢）。雖然阿夢嗰輯未出街，但係網民喺宣傳片見到佢嘅出現，已經忍唔住留言「阿夢原來仲有撈呢行？」 呢集講飾演「躁狂過兒」嘅羅莽滑鵰去搵姑姑時，唔小心炒鵰，搞到手都斷埋，可惜份旅遊保險claim咗16年都未claim到，怒氣沖沖走咗去衙門搵「睥青天」幫手。而徐錦江就扮番《九》裏面既打得又嗌得嘅「豹子頭」，無論口吻、神情同語氣都一樣，搞到成班網民話好掛住當年活躍八、九十年代電影圈嘅徐錦江，仲問「徐錦江點可以咁多年都無變」，大讚無論外型抑或心境都保養得宜！有網友留言話對徐錦江嘅印象，仍然停留喺港產三級片《南洋十大邪術》嘅造型，仲截埋圖甫出嚟。諗起都想睇番套戲，呢啲先係正宗嘅港產片嚟?嘛！